तीन मुक्तक
अन्जु सापकोटा “अनु”
१
मुटुको कुनामा सधैं बल्झिरहने तिम्रो याद छ,
भन्नु पर्ने धेरै बाँकी मनभित्रै एउटा संवाद छ।
दुनियाँ बदलिएर के भयो र, मेरो यो जिन्दगीमा,
तिम्रो र मेरो चोखो माया सधैं एउटा अपवाद छ
२
अद्भुत छ सम्बन्ध, नजीर किन चाहियो?
मन मिलिसक्यो भने, तस्बिर किन चाहियो?
विश्वास नै काफी छ यो जुनी काट्नलाई,
साथ तिम्रो पाएपछि, तक्दिर किन चाहियो?
३
न चल्छ जिन्दगी मेरो यहाँ कसैको इशारामा,
न खोज्छु ओत लाग्न म अरूको नै सहारामा।
सजाउँछु म आफ्नै दुनियाँ आफ्नै पसिनाले,
बगाउँछु आफ्नै डुङ्गा म त आफ्नै किनारामा।