मङ्लबार, साउन १, २०८१
Tuesday, July 16, 2024

मुक्तक मञ्च मकवानपुरले साहित्यकार दीपक समीप सहित दुई स्रस्तालाई सम्मान गर्ने

  • 129
  •  
  •  
  •  
  •  
  •  
  •  
    129
    Shares

मुक्तक मञ्च मकवानपुरले साहित्यकार दीपक समीप सहित दुई जनालाई ‘बहादुरानन्द स्मृति मुक्तक सम्मान-२०८०’ बाट सम्मानित गर्ने भएको छ।

मुक्तक मञ्च मकवानपुरले संस्थाको दोस्रो वार्षिक उत्सव तथा पहिलो अधिवेशनको अवसर पारेर साहित्यकार समीपलाई सम्मान गर्ने लागेको हो।

‘बहादुरानन्द स्मृति मुक्तक सम्मान’ मुक्तक मञ्च मकवानपुरका अध्यक्ष डि. बी. बर्तौलाले आफ्ना पिताको स्मृतिमा स्थापित गरेका हुन्। उक्त सम्मानको राशि ७ हजार ७ सय ७७ रुपैयाँ रहेको छ।

मध्य नेपाल नपा सोतीपसल, लमजुङमा जन्मिएर पोखरालाई कर्मथलो बनाउँदै आएका साहित्यकार दीपक समीप चालिसको दशकको अन्त्यदेखि साहित्य सिर्जनामा लागेका हुन्।

नेपाली साहित्य विविध विधा गजल, मुक्तक, कविता, गीत, कथा, लघुकथामा उत्तिकै कलम चलाउँदै आइरहेका समीपको ‘भूगोलभित्र नकोरिएको देश’ गजलसङ्ग्रह २०६२ सालमा प्रकाशित भइसकेको छ भने ‘अक्षर अक्षरमा देश’ मुक्तकसङ्ग्रह २०७८ सालमा प्रकाशित भएको छ।

उनले  सौगात द्वैमासिक, नवमाध्यम द्वैमासिक, उत्खनन् सामयिक सङ्कलन, गजल उत्सव समसामयिक गजल सङ्कलनको पनि सम्पादन गरिसकेका छन्।

उनी पोखरेली युवा सांस्कृतिक परिवारका पूर्व अध्यक्ष र वर्तमान सल्लाहकार, गजल सन्ध्या पोखराका पूर्व अध्यक्ष र वर्तमान सल्लाहकार, मुक्तक मञ्च केन्द्रीय समिति पोखराका सल्लाहकार, पुछारसिटे अभियानका सल्लाहकार, लघुकथा प्रतिष्ठान पोखराका सदस्य, नेपाली लेखक संघ गण्डकी प्रदेशका कोषाध्यक्ष र अक्षर यात्राका संस्थापकका साथै  संरक्षण कविता आन्दोलनका संस्थापक सदस्य हुन्।

साहित्यकार समीप यसभन्दा अघि राष्ट्रव्यापी उत्कृष्ट लघुकथाकार २०५४, राष्ट्रव्यापी उत्कृष्ट लघुकथाकार २०५५, खुल्ला मुक्तक प्रतियोगिता २०५५ प्रथम, गजल साधना सम्मान २०६३, भूगोलभित्र नकोरिएको देश गजलसङ्ग्रहका लागि, समता काव्य सम्मान (२०६६), शिल्पी साहित्य सम्मान (२०६६), स्रष्टा साहित्य चौतारी पुरस्कार (२०६८),गजलप्रतिभा पुरस्कार (२०६९), अक्षरयात्रा सम्मान (२०७०), गजल सन्ध्या सम्मान (२०७०), मुक्तक मन्च पोखरा सम्मान (२०७३), गजल मन्च मकवानपुर सम्मान (२०७४), लेखक कृति पुरस्कार २०७९, अक्षर अक्षरमा देश  मुक्तकसङ्ग्रहका लागि सम्मानित तथा पुरस्कृत भइसकेका छन्।

मुक्तक मञ्च मकवानपुरको कार्यसमितिको बैठकले आगामी माघ २७ गते संस्थाको दोस्रो वार्षिक उत्सव तथा पहिलो अधिवेशनको कार्यक्रम आयोजना तय गरेको छ ।अध्यक्ष डिवि बर्तौलाको अनुसार साहित्यकार दीपक समीपको साथ साथै साहित्यकार हरिकृष्ण काफ्लेलाई ७ हजार ५ सय रुपैयाँ राशिको तारा स्मृति सम्मान २०८०  र साहित्यकार विर्खे अञ्जानलाई ५ हजार ५ सय ५५ रुपैयाँ राशिको इन्दिरादेवी स्मृति सम्मान २०८० अर्पण गर्ने निर्णय गरेको छ ।

WRITE COMMENTS FOR THIS ARTICLE

0 0 votes
Article Rating
Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x